مشكورة اختي على الموضوع واسف على تاخر الرد,,, وتفضلي رأيي:
بالنسبة لكلام المختصين انا اقول على حسب المثل اسال مجرب ولا تسال طبيب.. انا عمري 18 سنة وحبيت بنت من 4سنين الى الان(الله يكتبلي الخير معها).. وانا ما اشوف ان حبها اثر في دراستي سلبا ولا اثر في اخلاقي ولا ديني سلبا.. بالعكس اثر حبها علي بفضل الله اولا واخيرا ايجابيا..
يعني ما خلت دراستي مهتزة أو فاشلة مثل ما يقولون "المختصين"
وايضا المختصين يقولون انه حب سريع وعابر.. أنا لي احب بنت تقرب لي من 4 سنين .. انا ابغى افهم كيف حب اربع سنوات يصير حب سريع وعابر "على قولت المختصين"
وايضا كلام (المختصين) انه غالبا لا ينتهي بالزواج .. أنا اعرف 4حالات زواج وخطوبة من مجتمعي الصغير (وللعلم ان الحالات الاربع من عائلات متعلمة تعليم عالي) وهذا ايضا رد على كلام الاخت دموع الذكريات
وايضا بالنسبة لكلام المختصين والمتفلسفين من المنتديات الاخرى انهم يقولون انه لو صار فيه زواج من حب مراهقة يكون زواج فاشل لانه مبني على حب مراهقين مايفكرون بطريقة صحيحة ,, هاذي قولتهم.. فانا ابغى اسال سؤال بصراحة ((معظم حالات الزواج في مجتمعنا العربي تصير من اثنين عمرهم ما شافوا بعض أو مافي بينهم الا معرفة سطحية,, وذولي يتزوجون وتصير حياتهم ناجحة باذن الله طبعا,, ولكن المتزوجين على حب مراهقة يصير زواجهم فاشل مع انهم كانوا يعرفون بعض .. فياخي انا ابغى اعرف: شي بالعقل وش تتوقعون يكون الزواج ناجح في الحالة الاولى ولا الثانية؟؟)
وحبيت اصحح معلومة لكثير من الناس اللي ما مروا بالحب بهذا السن,,, مو كل واحد حب بهذا السن شرط يكون ما يخاف ربه أو يكون قليل ادب لانه للاسف اسمع كثير من الناس يقولون مثل كذا,,
ويا عالم كل مراهق تختلف طريقة تفكيره عن الثاني يعني المراهق اللي يحب في هذا العمر لانه سمع الناس يحبون في فترة المراهقة (يعني يقلد) هذا اتوقع انه يضحك على نفسه,, بس واحد مثل حالاتي جاله فجأة ولا كان يتوقع انه يحب في هذا العمر والحب هذا استمر 4 سنين.. وهو في زيادة.. تتوقعون انه وهم!! ولا تقولون انهم قليلين بالعكس انا اعرف ناس كثير مثل حالاتي
وفي الاخير الحب ممكن يكون حقيقي او وهم على حسب شخصية المراهق (وطريقة تفكيره)يعني تتوقعون انه يتساوى طريقة تفكير مراهق ماهمه الا كيف يزين نفسه ويزين شعره ويقلد الفنان فلان او اللاعب مدري مين وعايش حياته في الشارع,, وبين مراهق عاقل يعرف وش يسوي والناس يقولون عنه انه رجال وعاقل,, تتوقعون انهم يتساوون في طريقة تفكيرهم!! وما احد يقول ان النوع الثاني قليل بالعكس النوعين من المراهقين كثار وانت شوف بنفسك واحكم..
وهاذا رايي واسف على الاطالة وعلى طريقة ردي ولكن من الغيظ والقهر .. سامحوني
آخر تعديل حب من طرف واحد يوم 06-14-2009 في 01:45 AM. | 
Z 
العرض العادي
